Isihloko sombhalo-ngqangi (Title of manuscript): Gqabhuka thumbandini (Burst abscess)
Umbhali (Author): Nondyebo Booi-Mtimde

Uhlobo lwabafundi (Readership)

Xa ubani eqwalasela umgangatho wolwimi olusetyenziswe ngumbhali kwisihobe sakhe, ungatsho ngaphandle kwamathandabuzo ukuba le ncwadi ilungele ukuba yenye yeencwadi ezinokumiselwa ukuba zifundwe ngabafundi besiXhosa boLwimi lwaseKhaya abakwiBanga lesibhozo ukuya kwiBanga leshumi (Grade 8 to Grade 10 learners). Aba ke ngabafundi abakwisithuba seminyaka elishumi elinambini ukuya kwishumi elinesine ubudala.

Umongo (Content)

Isizathu sokuba ndikholelwe kwaye ndigunyazise ukuba le ncwadi ibe nokusetyenziswa njengenye yeencwadi ezimiselwe ngokusesikweni liSebe lezeMfundo, kungenxa yokuba umongo wayo kunye nemixholo echatshazelwayo kule ncwadi iyangqinelana nomongo kwanemixholo enokufundiswa kula mabanga ndiwakhankanye ngasentla apha. Oku kwalamana komongo wale ncwadi nengxam yokufundwayo kwiBanga lesibhozo ukuya kuma kwibanga leshumi, kuvela ngokucace gca kule kharityhulam intsha nebizwa ngokuba yiCurriculum and Assessment Policy Statement. Umzekelo, phantsi kwebanga leshumi, abafundi kulindeleke ukuba babe sele bekwazi ukufunda isihobe ngengqiqo kwaye babe sele benaso nesakhono sokusihlalutya ngokuchubekileyo.

Into entle eyenziwa ngumbhali wesi sihobe, uNondyebo, kukuba kwimibongo yokuqala elishumi kwincwadi yakhe, ubonisa abafundi ngeendlela abanokuzilandela ekuhlalutyeni nasekugoca-goceni umongo nomxholo oqulathwe ngumbongo lowo.Umbhali akaphelelanga apho, uthi xa eyiqukumbela incwadi yakhe kwela candela B, ukusukela kwiphepha lama-69 ukuya kwelama-84, andlalele abafundi ngamanqanaba asixhenxe aziintsika kuhlalutyo lombongo.Kula manqanaba ke uquka iindidi zemibongo, izafobe, imfano zandi, imvano ziphelo, njalo njalo. Oku akudandalazisileyo malunga nohlalutyo kuxhaswa ncakasana nakwiincwadi zohlalutyo nocamngco lweejenri zoncwadi ezityebileyo ezifana nezi: The New Owl Critic ngokubhalwe nguHeese, M noLawton, R (1994); Ubuqholo besihobe, ngokubhalwe nguDN Jafta (1987) kunye noMdiliya wesihobe, ngokubhalwe nguM Jadezweni (2008).

Ingcebiso nje ebendinokuyinika kulo mango kumbhali yeyokuba nanjengoko ndikhuthaza ukuba le ncwadi imiselwe abafundi besikolo, kungakuhle xa enokongeza oku kulandelayo kumabakala okuhlalutywa kwesihobe (izinto ezo zivelayo kwezi ncwadi zikhankanywe ngasentla):

• Umahluko phakathi kwembongi yenkundla neyosiba okanye iimpawu zembongi yosiba.
• Isihloko somhobe.
• Ulwimi lwesihobe.
• Izandi.
• Inkangeleko yomhobe apha ephepheni.
• Isingqisho nesingqi.
• Intsingiselo okanye umyalezo womhobe.
• Izithako ezisetyenzisiweyo ekuvezeni le ntsingiselo yomhobe.
• Indawo ezenzeka kuyo iziganeko.
• Uvakalelo oluvelayo kulo mbongo.
• Iziganeko eziphambili kumhobe lowo.

Ulwimi lwesihobe sikaNondyebo Booi-Mtimde

UNondyebo kwesi sihobe sakhe usebenzise ulwimi olusulungekileyo ndawonye nesigama esikumgangatho ofanelekileyo nesinokulandeleka kwaye sifikeleleke lula kubafundi bebanga lesibhozo ukuya kwabo bakwibanga leshumi. Ulwimi lwakhe lukhangeleka ilolukhethwe kakuhle nangocoselelo, kunjalo nje uyaphumelela nasekusebenziseni izangotshe eziphuhlileyo kwisihobe sakhe. Uya kuqaphela ukuba lo mbhali ukwazile ukwenza into ephume izandla nencomekayo ngokuthi abe nenani elibalekayo lemibongo yakhe athe wayinika izihloko ezingamaqhalo okanye izaci. Imizekelo: Gqabhuka thumbandini (Burst Abscess); Inyathi ibuzwa kwabaphambili (Experience is the source of knowledge); Akukho nzwana ingenasiphako (There is nothing that is perfect under the sun); Umthathi uyawuzala umlotha (Evil can come out of good, as can good from evil) and Inkovu iphum`ethangeni (Everything has its source).

Inye nje into enokuba ngumqobo ekubeni le ncwadi yengqokelela yemibongo ibe nokushicilelwa ngokukhawuleza ukuze ithunyelwe ezikolweni, oko ke ziziphene ezibalekayo ezifumaneka kwintshayelelo yombhali, ubume bencwadi, kweminye yemibongo ukuya kuma kwiCandelo B: Amanqaku okuhlalutya umbongo asixhenxe. Uninzi lwezi ziphene ke ziquka ulandelelwano lwamagama olugwenxa, iziphene zopelo, uqhawulo lwamagama olungachanekanga kunye nonobumba abangabhalwanga kakuhle maxa wambi.  Emva kokuhlelwa nokulungiswa kwezi ziphene zikhankanyiweyo kule ncwadi, ndiqinisekile ukuba ingakulungela ngaphandle kwamathandabuzo ukushicilelwa.

Gqabhuka Thumbandini

Incwadi uGqabhuka thumbandini (Burst Abscess) iqulathe ingqokelela yemibongo engama-22. Le mibongo ayahlukanga nje ngobude bayo koko yahluke nangemixholo yayo, ndawonye nangeenkalo ezithile ezichatshazelwayo kubomi babantu ngokupheleleyo. Ngokwemixholo yombhali kunye nomongo ovela kuninzi lwale mibongo, kucaca okwekati emhlophe ehlungwini ukuba umbhali kudala eyikokosile imvakalelo yakhe ngezinto ezahlukileyo ebomini bakhe, kuquka ezo zimehleleyo ebomini, ukuya kwezo ziveza iinkumbulo ezimbi nezintle kwindlela yobomi asele eyihambile. Kuyaqapheleka kwindlela abhala ngayo ukuba oku kubonga kwakhe ngosiba yinto ekudala ithe chu ukumkhulela oku kwethumba, yathi ngokuya imkhulela kwabonakala ukuba ifuna ukumtshisa imqaqambele, de yagqabhuka yakuvuthwa ngaphakathi kuye. Nanjengethumba ke elithi lakugqabhuka kufumaniseke ukuba iintlungu azisavakali kangako, kuphantse kucace ukuba nalapha kumbhali kaGqabhuka thumbandini ukuba ngokudandalazisa konke okungaphakathi kuye ngokubhala esi sihobe, umvandedwa kwaneentlungu ezidandathekisa intliziyo yakhe ziya kutsho zithi thimbilili. Kakade ukwabelana nabanye abantu ngeentlungu zakho liyeza. Kungoko nentetho yomz`oNtsundu liyigxininisa into yokuba umntu ngumntu ngabantu.

Eyona nto incomekayo ke yeyokuba imobongo yakhe yokuqala ilandelwa yimibuzo enokusetyenziswa ngumfundi, ingakumbi lowo wasesikolweni ekuzohloleni ngoko athe wakufunda. Le mibuzo ikwasisikhokelo sohlautyo lombongo, uvavanyo lombongo, ukanti ikwacazulula nentsingiselo yombongo ukuze umfundi ayilandele kakuhle ingxam yombongo lowo. Uthi naphaya ekupheleni kwayo incwadi umbhali anike abafundi bakhe amanye wamabakala abanokuwasebenzisa kuhlalutyo lombongo. Ezi ke zizinto ezincomekayo kakhulu ngale ncwadi yakhe. Akabhalanga nje imibongo wandula wayiyeka ukuze umfundi azicubhele umqa ngokunokwakhe.

Kule ngqokelela yemibongo ke uNondyebo iinjongo zakhe kukwabelana nabafundi ngobomi bakhe, phofu bomi obo bungahlukanga ncam kobo bomntu wonke, kuba izinto athetha ngazo zeziqhelekileyo nakuwuphi na umzi. Imibongo yakhe ingeemeko ezahlukileyo kubomi bakhe ndawonye nangentlalo jikelele.  Umbongo wokuqala, nesithiywe ngawo isihloko sale ncwadi, uGqabhuka thumbandini, uveza iintlungu nobunzima obuthe babenza ubomi bakhe bazala ziinyembezi nezijwili. Umbhali uyiveza kakuhle into yokuba kubunzima bakhe bekungelula nokufumana uncedo kuba ubesithi sele “erhwaphiliza abadlulayo, suke bacing`ukuba uligeza elitsha”. Nangona kunjalo ke ithemba lokugqibela, ithemba lamathemba, ibe lilo elibe nguMhlanguli wakhe: UThixo. Mve xa esithi: “Uth`uDavide, akozeli akalali umgcini kaSirayeli”.

Iliqela ke imibingo yombhali eveza phandle ukuba iimeko ezinzima zobomi bakhe uye waziphumeza kwaye wazoyisa ngokoyama kwithemba elinguThixo. Kumbongo wesibini, uChukumis`amathambo (shake the bones of the deceased), umbhali uncoma umlisela nomthinjana othi xa efumene amathanyana kubhelu lomsele ungaphuncukwa sisimilo, koko uzonwabele ngendili nesithozela uxele ookhokho nemilowo yamandulo. Oku kuziphatha kwabo kakuhle kuko ke oku kushukumisa loo mathambo alele ukuthula, mathambo lawo ayithandayo indili nembeko, nayichasayo imeko egqamileyo yokuphathwa gadalala kweentsapho ngenxa yolu bhelu lomsele, ngabula mbhali. Inkolo nokuzithoba kombhali iyavela nakulo umbongo nanjengoko emana ukuqukumbela izitanza zakhe ngolu hlobo: “Yanga iNkosi ingev`umthandazo wabantwana abancinci ngenxa kaYesu Krestu iNkosi yethu”.

Akaphelelanga ke apha kule mibongo umbhali ukugadlela ngemiba ejolise kwintlalo yoluntu. Nakule mibongo ilandelayo umongo wakhe ugxininisa kwintlalo yethu jikelele, nasekwakheni, ekuxhobiseni okanye ekulumkiseni uluntu ngokubanzi: Inyath`ibuzwa kwabaphambili (Experience is a source of knowledge); Akukho nzwana ingenasiphako (There is nothing perfect under the sun); Intlebendwane (Gossip); Ubomi (Life); Uthando (Love); Tomorrow is forever; Yiba nguwe (Be yourself); Ziyolise ngaYe (Rejoice in Him); njalo njalo.

Umbhali umana ukuthi gqolo esityhilela nangobomi bakhe, usapho lwakhe nangendlela ahle esenyuka ngayo ebomini ukuze aze kuthi ga kule ndawo akuyo namhlanje. Oku ukudandalazisa kule mibongo ilandelayo: UZintle (Her daughter`s name, Zintle (Beauty)), kulo mbongo umbhali usizobela ubuhle bentombi yakhe uZintle, ntombi leyo ayifanisa nencindi yobusi neentyatyambo, nayibona njengethemba leAfrika.

Okwesibini, kumbongo Usiba lukaNondyebo (Nondyebo`s art of writing), umbhali uncoma ukunyamezela kwakhe imfundo nenkxaso kaMdali kwimpumelelo yakhe esikolweni. Iinkumbulo zomyolelo katata wakhe mhla wayelishiya eli limagad`ahlabayo ziyavela kumbongo othi Zugcin`abantwana bam (Look after my children). Okokugqibela, kumbongo Iintshaba zam (My enemies), umbhali usivezela ubunzima aye wajongana nabo ebomini, nzima ezo zize neentshaba zakhe ukusukela ekuzalweni kwakhe, ekuqaleni kwakhe isikolo, ukuya esinaleni nasekuqaleni kwakhe ukusebenza iintshaba zakhe zimthe mbende zingafuni kunikezela. Kuthe ukuze kube ngcono nasekubeni ziphantse zamahlukanisa nonina, wakholosa ngoMdali, ngenene wawafumana amandla okujongana nezo ntshaba zakhe.

Ubuthandazwe nokuzingca kombhali ngezwekazi lakowabo i-Afrika kuvela rhoqo apha kwisihobe sakhe. Kumbongo othi Ngxe Ma-Afika (Pardon! Africans) umbhali uvakala ekhathazekile yimeko yezwekazi lakowabo iAfrika. Ezona zinto zimxhela umphefumlo nezigqubayo kwizwekazi leAfrika ngokombhali zezi: Indlala; uqhawulo-mitshato; ukusetyenziswa kweziyobisi; ukufa okungapheliyo nokukhokelela ‘ekugcwaleni kooNontsumpa’ nobundlobongela. Ngokombhali konke oku kungancipha xa uluntu lunokoyama ngoThixo ngaphezulu kokubhedesha umtyholi.

Okwesibini, kumbongo Ikhaya lam (My home), umbhali ubongoza amaAfrika ukuba azingce ngeengcambu zawo, imvelaphi yawo, kwaye uyayigxininisa nento yokuba iAfrika isisiqalo, izingcambu, kwaye iziziqhamo zempumelelo kuwo onke amaAfrika azingcayo ngayo. Kananjalo, kumbongo onesihloko esiveza uchasaniso: Umthathi uyawuzala umlotha (Evil can come of good, vice versa), umbhali ukhumbuza ekwafundisa umlisela nomthinjana weAfrika ngamaqhawe eli zwekazi adlale indima ephambili ekuphuhliseni ubuAfrika. Ukhathazekile ke kuba ngokokubona kwakhe ulutsha lwanamhlanje lweAfrika aluhambi ezinyaweni zamaqhawe amandulo. Mve kwisitanza sesithathu xa esithi: “Nzala yenu isuke yakreqa kuni. Ndlebe zayo zimomen`iziyobisi.”

Ukanti kwelinye icala, kumbongo osihloko singu2010 (Year 2010), umbhali uveza ubuhle abubonileyo ngezwekazi leAfrika. Kulo mbongo umbhali uncoma indlela izwekazi elimanyene laze laphathisana ngayo kakuhle ekuququzeleleni nasekusingatheni iNdebe yeBhola ekhatywayo yeHlabathi kaFifa kumnyaka ka-2010 eMzantsi Afrika.

Xa umfundi eqwalasela kwindlela umbhali ayichaphazele ngayo imixholo eyahlukileyo kwingqokelela yakhe yemibongo, uya kufumanisa ukuba isakhono sombhali ekubhaleni sikhethekile kwaye siphuhlile kakhulu. Indawana nje inye anokuqwalasela kuyo umbhali, kukulungiswa kweziphene esele zikhankanywe ngasentla kwisihobe sakhe, ukuze sibe nokushicilelwa.

*Gqabhuka Thumbandini is available from Logical Books in Khayelitsha. Contact Madoda Gcwadi at 076 173 1474.